SINATURA DE CONVENIO EN MADRID
Arzúa xa conta cun exemplar do convenio que achega 2 millóns de euros procedentes do Ministerio de Fomento para a mellora da travesía urbana
Xaquín García, Alcalde de Arzúa, regresou de Madrid despois de ser recibido polo Ministro de Fomento, o galego José Blanco, para a sinatura do convenio de colaboración entre as dúas administracións que achegará a Arzúa a cantidade de 2 millóns de euros destinados ao financiamento do proxecto de mellora da estrada nacional 547 no tramo de travesía urbana de Arzúa.
No encontro entre José Blanco e Xaquín García, que tivo lugar no Ministerio de Fomento, ademais da sinatura do correspondente convenio que se comezará a facer efectivo nos vindeiros días unha vez que o Concello de Arzúa xa ten redactado o correspondente proxecto e éste xa foi autorizado pola Dirección Xeral de Patrimonio Cultural; o Alcalde de Arzúa trasladoulle ao Ministro outra serie de cuestións que afectan ao noso municipio e que responden a peticións dos nosos veciños.
Así, a futura autovía entre Santiago e Lugo centrou boa parte da conversa entre os dous mandatarios, Xaquín García preocupouse por indicarlle a José Blanco a importancia que para Arzúa terán as conexións que se establezan dende a futura vía de alta capacidade co municipio. José Blanco amosou a súa confianza en que as obras da autovía, se ben se verán ralentizadas dados os recortes presupostarios e a grave crise económica que sufre o país, continuaranse exectuando coa máxima celeridade posible no tramo xa contratado entre Lavacolla e Arzúa. José Blanco amosou a súa preocupación por axilizar a licitación do tramo entre Arzúa e Palas de Rey, que presenta maiores dificultades ao estar á espera do correspondente informe da Xunta de Galicia.
O Alcalde de Arzúa agradeceu a boa disposición do Ministro galego quen se comprometeu a visitar Arzúa unha vez finalicen as obras de acondicionamento da travesía que implantarán unha imaxe completamente renovada e moderna a un concello que é lugar de paso do Camiño Francés e porta de entrada a Compostela.
Os dous millóns de euros que o Ministerio de Fomento destinará a esta actuación, cuxas obras serán contratadas polo Concello de Arzúa, destinaranse á remodelación da travesía coa finalidade de mellorar as condicións de seguridade vial e peonil, ao tempo que resulta convinte dignificala incluíndo a dotación de ramais de acceso á mesma.
O Concello de Arzúa proxectará e executará baixo a súa dirección as actuacións relativas ás beirarrúas, Camiño de Santiago, bordillo e outros servizos fundamentais como son o aumento da presión da auga na zona sur da travesía ou a mellora das canalizacións do saneamento. Tamén terá lugar a renovació do pavimento para cuxa execución o Ministerio de Fomento asume o compromiso de prestar a asistencia técnica necesaria.
A aportación total dos 2.000.000 de euros distribuirase en dúas anualidades, correspondendo un millón para cada unha delas.
O Alcalde de Arzúa, Xaquín García, quixo agradecer públicamente a "atención recibida por parte do Ministro e o seu compromiso non só con Arzúa senón co noso país" ao tempo que indicou que "a actuación proxectada para a travesía representa, sen dúbida, unha gran noticia para Arzúa, unha actuación que requiriu de moitos trámites e de moitas negociacións ata lograr facela realidade".
Finalmente, Xaquín García, amosou a súa satisfacción ao considerar que "esta actuación proxectará unha imaxe completamente renovada de Arzúa o que favorecerá os intereses dos nosos veciños e veciñas, que constitúe o noso principal obxectivo".
« Voltar
